विमान दुर्घटनामा ब्राजिली फुटबलर सहित ७६ को मृत्यु

१४ मंसिर एजेन्सी ।

कोलम्बिया— ब्राजिली फुटबल टोलीका सदस्य चढेको विमान कोलम्बियामा दुर्घटना हुँदा ७६ जनाको मृत्यु भएको छ। पाँच जना जीवित भेटिएको प्रहरीले जनाएको छ। विमानमा ७२ यात्रु र ९ चालक दल सदस्य सहित ८१ जना सावर थिए।

चार्टर्ड सो विमानमा ब्राजिलको उच्च तहको सापेक्विन्स फुटबल टोलीका सदस्य सवार थिए। उनीहरु मेडेलियनको कोपा सुअमेरिकाना फुटबल प्रतियोगितामा मेडेलियनकै अर्को क्लब एट्लेटिको नाक्योनलविरुद्ध खेल्न गइरहेका थिए।

दक्षिण अमेरिकाकै दोस्रो ठूलो महत्वपूर्ण क्लब प्रतियोगिताको पहिलो लेगको फाइनल खेल्न मेडेलियन जाँदा विमान दुर्घटनामा परेको हो। आयोजक दक्षिण अमेरिकन फुटबल कन्फडेरेसनले निर्धारित खेल सहित सबै खाले गतिविधि रद्द भएको जनाएको छ।

सो विमानमा बाँचेका मध्ये एक जना सापेक्विन्सका डिफेन्डर एलन रसेल भएको पुष्टि भएको छ। टोलीका अरु दुई सदस्यहरु पनि जीवित रहेको बताइएको छ। गोलकिपर ज्याक्सन फोलम्यान, डेनिलो तथा फिजियोथेरापिष्ट पनि जीवित रहेको जनाइएको छ।

दक्षिणी ब्राजिल सापेकोको फुटबल टोली सन् २०१४ मा ब्राजिलको ए डिभिजनमा उक्लिएको थियो। टोलीले गत साता अर्जेन्टिनाको सान लोरान्जोलाई पराजित गर्दै लेगको फाइनलमा प्रवेश गरेको थियो।

दुर्घटनामा परेको विमान ब्रिटिश एरोस्पेस १४६ लाई बोलिभियन चार्टर्ड एयरलाइन लामियाले सञ्चालन गर्दै आएको थियो। मध्यरातमा विमान मेडेलियन क्षेत्रको बाहिरपट्टि पहाडी इलाकामा दुर्घटनामा परेको हो। दुर्घटनास्थलमा आगोको कुनै छनक नदेखिएकाले जीवित भेटिने सम्भावना अझै रहेको बताइएको छ।