रामेछापलाई नमूना नगरपालिका बनाएर देखाउछुः मगर

रामेछाप नगरपालिकामा चुनावी अभियान तिब्र बनेको छ । २०३६ सालमा देशमा बहुदलिय व्यवस्था स्थापना गर्नको लागि निलो सट लगाएर पञ्चायती व्यवस्थाको विरुद्ध उभिएका नरबहादुर मगर नेपाली काग्रेसको तर्फबाट रामेछाप नगरपालिकाको नगर प्रमुखको उम्मेदवार हुन् ।

देशमा राजनीतिक परिवर्तनको लागि लामो समयदेखि राजनीतिमा सक्रिय रहदै आएका मगरले वैशाख ३१ हुने स्थानीय तहको निर्वाचनमा आफ्नो जित निश्तिच रहेको दावी गरेका छन् । नगर प्रमुखका उम्मेदवार मगर दुई पटक जिल्ला कार्य समिति रामेछापका सदस्य, तीन पटक महाधिवेशन प्रतिनिधि भइसकेका छन् । निर्वाचनमा विजयी भए रामेछाप नगरपालिकालाई नमूना नगरपालिका बनाउनेदेखि लिएर कनै पनि भ्रष्टचारजन्य गतिविधि हुन नदिने प्रतिबद्धता मगरले व्यक्त गरेका छन् । रामेछाप नगरपालिकालाई समृद्ध बनाउने योजना, लगायतको विषयमा केन्द्रीत रहेर रामेछापका नगर प्रमुखका उम्मेदवार मगरसँग रामेछाप न्युजले गरेको कुराकानीः

चुनावी अभियान कसरी अगाडि बढीरहेको छ ?
–जनताको चाहना र पार्टीको विश्वासमा म रामेछाप नगरपालिकाको नगर प्रमुखको उम्मेदवार बनेको हुँ । लामो समयदेखि राजनीतिलाई नै कर्म बनाएको कारण जनताले मलाई जिताउछ भन्नेमा ढुक्क छु । निर्वाचनको प्रचार–प्रसारको अभियानमा छौं । सिंगो पार्टीको साथ, जनताको विश्वासको कारण मेरो पक्षमा राम्रो महालो बनेको छ ।

निर्वाचन जितेपछि के छ तपाईको योजना ?
–निर्वाचनमा जनतालाई मलाई विजय गराए जनताको चाहना अनुसार काम गर्छु । नगरपालिकालाई नमूना गरपालिकाको रुपमा विकास गर्ने योजना अगाडि सारेको छु । सडक, स्वास्थ्य, शिक्षा, रोजगारी, उद्योग धन्दा स्थापना लगायतका आधारभूत क्षेत्रमा पहिलो चरणमा काम अगाडि बढाउने छु । आजको भोली नै सबै समस्याको समाधान हुँदैन । क्रमश, प्राथमिकता निर्धारण गरेर काम गर्छु ।

रामेछाप नगरपालिकाका बासिन्दालाई समृद्ध बनाउन के सोच्नु भएको छ ?
–रामेछाप नगरपालिका रामेछापको पुरानो सदरमुकाम पनि हो । प्राकृतिक स्रोध साधनमा धनी भएपनि यसको सही ढंगले उपयोग हुन सकेको छैन् । मुख्य त रामेछाप नगरपालिकाका बासिन्दालाई धनी बनाउने भनेको लिखु खोलामा सञ्चालिन जलविद्युत आयोजना नै हो । अब लिखुको पानीबाटै धनी बनाउने योजना अगाडि सारिने छ । लिखु खोलामा सञ्चालन हुने सबै जलविद्युत आयोजनामा सबै रामेछाप नगरपालिकाका जनतालाई सेयर हाल्ने व्यवस्था गरिनेछ ।
नगरपालिकाभित्र सञ्चालन हुने उद्योगमा स्थानीयवासीलाई अनिवार्य सेयर प्रदान गर्ने व्यवस्था गर्नेछु । रामेछाप नगरपालिकाभित्र क्रसर उद्योग सञ्चालन गर्ने, त्यसमा पनि स्थानीयलाई सेयर दिइने छ । उद्योग स्थापना गरेर रोजगारीको सृजना गरिन छ । जसको कारण राजेगारी र यहाँका बासिन्दाको आर्थिक जीवनस्तर उकास्न ठूलो टेवा पुग्नेछ ।

कृषि क्षेत्रमा परिवर्तन गर्ने तपाईको के योजना छ ?
–नेपाल नै कृषि प्रधान देश हो । रामेछाप नगरपालिका पनि कृषि पेशामा नै बढी मानिसहरु आश्रित छन् । अब परम्परगत रुपमा होइन ।आधुनिक र वैज्ञानिक ढंगबाट कृषि पेशालाई रुपान्तरण गर्नुपर्छ । जुनार खेती, अनार खेती लगायतका फलफुल खेतीलाई पकेट क्षेत्रको रुपमा विकास गर्ने योजना अगाडि सारेको छु ।

सडक निर्माण भएपनि स्तरउन्तती नहुँदा जनता हैरान छ ? सडक निर्माण गर्न कस्तो कदम चाल्नुहुन्छ ?
–अब नगरपालिकाको सबै टोलटोलमा सडक पुग्छ । केही पग्न बाँकी रहेको क्षेत्रमा सडक पुर्याउन मेरो पहिलो प्राथमिकता हुनेछ । अब निर्माण भएका सडकलाई व्यवस्थित गनुपर्छ । नगरपालिकाले नै डोजर खरिद गरेर सडक पुग्न बाँकी रहेका नगरपालिकाको टोलटोलमा सडक पुर्याउने छु । दुई बर्षपछि अब जनताले मलाई सडक चाहियो भनेर माग्ने अवस्थाको अन्त्य गरिनेछ ।
विद्युत खानेपानीको बारेमा के सोच्नु भएको छ ?
–अबको दुई बर्षभित्र रामेछाप नगरपालिकाका सबै वडामा बिजुली बल्छ । अहिले पनि विद्युतीकरणको काम भइरहेको छ । विशेषगरी खानेपानीको समस्या निकै जटिल बन्दै गएको छ । अब लिखु खोला र सुनकोसीबाट लिफ्ट सिस्टम मार्फत खानेपानी व्यवस्था गरिनेछ । केही योजना अहिले पनि सञ्चालन भइरहेका छन् ।

अन्त्यमा केही भन्नु छ कि ?
–अब बोल्ने भाषणा गर्ने भन्दा पनि काम गरेर देखाउने बेला आएको छ । मेलै निर्वाचन जितेर नगर प्रमुख भएको अवस्थामा भ्रष्टचारजन्य कुनै पनि क्रियाकलाप हुन दिन्न । चाहे आफ्नो पार्टीको होस । चाहे अन्य पार्टीको होस । सुशासन र पारदर्शिता मेरो पहिलो प्राथमिकता हुनेछ । नगरपालिकाभित्र अनियमितता हुने दिने छैन् । पाँच बर्षको कार्यकालयमा सुशासनमा नमूना नगरपालिका बनाएर देखाउछु । म नगरपालिकाबाट केही कमाउन होइन । जनताको सेवा र विकास गर्न उम्मेदवारी दिएको हुँ ।