लिखु–४ जलविद्युत आयोजनाको सुरुङ निर्माण कार्य अगाडि बढेपछि खुसियाली

११ साउन, रामेछाप । रामेछाप र ओखलढुंगाको सीमाना लिखु खोलामा बन्न लागेको लिखु–४ जलविद्युत आयोजनाको काम अगाडि बढेको छ । आयोजनाको काम अन्तर्गत सुरुङ खन्ने काम अगाडि बढेको हो । ओखलढुंगा रगनी तर्फतफको सुरुङ मार्ग निर्माण गर्नको लागि विष्फोटक पदार्थ मार्फत सुरुङ निर्माणको कार्य अगाडि बढाइएको छ ।

रामेछापको लिखु तामाकोसी गाउँपालिकास्थित लिखु खोलामा लिखु–४ जलविद्युत आयोजना निर्माण स्थल रहेको ५२ दशमलव ४ मेगावाटको लिखु–४ जलविद्युत आयोजना अगाडि बढेको हो । जलविद्युत लगानी कम्पनी ग्रिन भेन्चरले सुरुमा १ सय २० मेगावाट डिजाइन गरेको भएपनि हाल ५२ दशमलव ४ मेगावाट विद्युत उप्पादन गर्ने गरी काम सुरु भएको छ ।

प्रस्ताव बमोजिम काम नहुने भएपछि झण्डै सात वर्ष देखि उक्त आयोजनाको सबै काम ठप्प थियो । आयोजनाका प्रबन्धक बद्री रिजालले डिजाइन घटेको र उत्पादित विद्युत नेपाल विद्युत प्राधिकरणले किन्ने गरी सम्झौता भएको बताए । उत्पादित विद्युत नेपाल विद्युत प्राधिकरणको न्यू खिम्ती सव स्टेशनमा जोडिने छ ।

लिखु ४ को उत्पादन गृह ओखलढुंगाको खिजीदेम्बा गाउँपालिका देखि रामेछापको मन्थली नगरपालिकाको देविटारसम्मको साढे १७ किलोमिटर २ सय २० केभीए प्रशारणलाइन आयोजना आफैले निर्माण गर्नेछ । ३० महिना अवधिमा विद्युत उत्पादन गरी राष्ट्रिय प्रशारण लाइनमा जोड्ने लक्ष्य रहेको सो आयोजनाको कुल लागत ९ अर्ब ५४ करोड अनुमान गरिएको छ ।

रामेछाप र ओखलढुंगाको सीमा नदी लिखुको पानी साविक खिजी चण्डेश्वरी र भुजि गाविकोबीचबाट भूमिगत नहरमा फर्काइ ओखलढुगांको लिम्तीमा निर्माण हुने उप्पादन गृहमा खसालिने छ । आयोजनामा सांढे ४ किलोमिटर भुमिगत नहर र २ सय ३७ मिटर पेनस्टक पाइप जडान गरी २ सय १६ मिटर उचाईबाट उत्पादन गृहमा पानी खसालीने गरी डिजाइन गरिएको छ ।

तस्बीरः पत्रकार प्रज्वल पौडेलबाट