स्थानीय तहलाई पुनःनिर्माणको जिम्मा

२६ असोज, काभ्रे ।
राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशील ज्ञवालीले सङ्घीयताकै आधारमा आवास पुनःनिर्माणको जिम्मेवारी स्थानीय तहलाई दिइने बताउनुभएको छ । आवास पुनःनिर्माण स्थानीय समिति बनाएपछि सोही समितिले अनुगमन गरी समस्या र चुनौतीबारे मूल्याङ्कन गर्दै गुणस्तरीयरुपमा काम सम्पन्न गराउने उहाँले बताउनुभयो ।

उहाँले स्थानीय तहका प्रमुख तथा प्रतिनिधि, राष्ट्रिय मान्यता प्राप्त दलका प्रतिनिधि रहने स्थानीय पुनःनिर्माण समिति बनाइने तथा त्यसको प्रदेश सांसद, जिल्लास्थित समन्वय अधिकारीले अनुगमन गर्ने नीति बनाइने बताउनुभयो । उहाँले स्थानीय तहमा प्राधिकरणको संरचनाभित्र स्थानीय तहमा गएका शिक्षा, शहरी विकासलगायतको कर्मचारीलाई राखिने बताउदै आवास कति बने, कति बन्दैछन्, कस्ता बने भन्ने सबै प्रतिवेदन स्थानीय समितिले तयार पार्ने बताउनुभयो ।

प्रमुख ज्ञवालीले प्राधिकरणले ‘एक पालिका, एक एकीकृत बस्ती’ योजना ल्याइने र यसबाट पातलिएका बस्तीमा हुने पूर्वाधारका बजेटमा बचत हुने बताउनुभयो । उहाँले दुई हजार परिवारको बस्ती स्थानान्तरण गर्नुपर्ने र १८ हजार परिवार सामाजिक, आर्थिक जोखिममा रहेकाले आर्थिक उपार्जनका कार्यक्रम ल्याउनु आवश्यक रहेको बताउनुभयो ।

उहाँले हालसम्म कूल लाभग्राहीमध्ये ९७ प्रतिशतले पहिलो किस्ता अनुदान रकम, ६७ प्रतिशतले दोस्रो किस्ता र ३० प्रतिशतले तेस्रो किस्ता लिइसकेको बताउनभयो । उहाँले भन्नुभयो, “यो प्रगति हेर्दा निरास हुनुपर्ने देखिन्न, पाँच वर्षमा आवास निर्माण सकिन्छ, समय थप्नुपर्छ जस्तो लाग्दैन ।” समग्रमा ७५ प्रतिशत आवास बन्दै गरेको सर्वेक्षणले जनाएको र बाँकी रहेको दुई वर्ष तीन महीनामा सकिने उहाँको धारणा थियो ।

काभे्रपलाञ्चोकको धुलिखेलमा आर्थिक पत्रकार समाजद्वारा पुनःनिर्माणबारे आर्थिक पत्रकारका लागि आज धुलिखेलमा आयोजित दुईदिने अभिमुखीकरण कार्यक्रमलाई सम्बोधन गर्दै ज्ञवालीले रानीपोखरीको पुनःनिर्माण तीन खण्डमा विभाजन गरी सम्पन्न गरिने योजना बनाइएअनुसार पहिला वरिपरिको पर्खाल बनाउने, पोखरीको तल पानी भर्ने तथा अड्याउने योजना र पोखरीको बीचमा रहेको बालगोपालेश्वरको मन्दिर बनाउने बारे छलफल भइसकेको बताउनुभयो ।