सुनापती गाउँपालिकाभित्र २७५ किलोमिटर सडक बन्यो, मध्य पहाडी राजमार्गले जोडियो

१ जेठ, रामेछाप ।
सुनापती गाउँपालिभित्र सडक निर्माणको कामले तीब्रता पाएको छ । करिब १५ बर्षको अवधिमा गाउँपालिकाको पाँच वटै वडाभित्र गरी २ सय ७५ किलोमिटर सडक निर्माण भएको हो । सडक निर्माण भएपनि हालसम्म कुनै पनि सडक कालोपत्रे भने हुन सकेको छैन् ।

तीन नम्बर सरकारले यस आर्थिक बर्षबाट कालोपत्रे गर्ने योजना अन्तर्गत खैरेनीघाटबाट खनियापानी, बेथान हिलेदेवी गाल्वा हुँदै खोलाखर्कसम्मको सडक कालोपत्रे गर्ने योजना अनुरुप दुई करोड लगानीमा सडकको स्तरउन्नतीको काम अगाडि बढाएको छ । गाउँपालिकाभित्र हालसम्म २७६ किलोमिटर कच्ची सडक निर्माण भएर सञ्चालनमा आएको छ ।

गाउँपालिकाभित्र अधिकाशं टोलटोलमा नै सडकको पहुँच पुगेको छ । तर बर्षाको समयमा कतिपय सडकमा भने यातायात सञ्चालन गर्न कठिन छ । गाउँपालिकाको तथ्याङ अनुसार वडा नम्बर १ गुन्सीमा ६१ किलोमिटर, वडा नम्बर २ दिमीपोखरीमा २७ किलोमिटर, वडा नम्बर ३ हिलेदेवीमा ५७ किलोमिट, वडा नम्बर ४ बेथानमा ५२ किलोमिटर र वडा नम्बर ५ खनियापानीमा ७९ किलोमिटर सडक निर्माण भएको छ । गाउँपालिकाले अब नयाँ सडक खन्ने कार्यलाई बन्द गरेर निर्माण भएको सडकलाई व्यवस्थित बनाउने नीति लिएको छ ।

गाउँपालिकाभित्र हालसम्म निर्माण भएको सडकको स्तरउन्तती गर्ने कार्यमा ध्यान दिएको गाउँपालिकाका प्रवक्ता कमल केसीले बताए । जस मध्ये गाउँपालिकाको केन्द्रसम्म जोडने चार वटा सडकको डिटेल प्रोजेक्ट रिर्पोट (डिपिआर) तयार भएको छ । गाउँपालिकाबाट राजधानी काठमाडौं जोडने खैरेनीघाटको पुल निर्माणाधिन अवस्थामा रहेको छ । त्यसैगरी गाउँपालिको केन्द्रदेखि वडा नम्बर १ गुन्सी जोडने खानीखोलमा कल्भर्ट रहेको छ ।

गाउँपालिकाका प्रमुख प्रशासकीय अधिकृत सुनिल निरौलाले गाउँपालिकाभित्र निर्माण भएको सडक मध्ये १२ महिना चल्ने सडक २० प्रतिशत र बाँकी ८० प्रतिशत सडकमा बर्षाको समयमा यातायात सञ्चालन हुन सक्ने अवस्था नरहेको बताए ।

गाउँपालिकाले खानीखोलामा मात्र तीन वटा पक्की पुल निर्माण गर्नुपर्ने योजना अगाडि सारेको छ । गाउँपालिकाका अध्यक्ष धावा लामाले खानीखोलाको साथै घट्टे खोलमा पनि दुई वटा पक्की पुल आवश्यकता भएको बताए । दुसिङ्ग खोलमा दुई वटा, छिमिर खोलामा १ वटा, भ्वाँसा खोलामा १ वटा, कामा खोलामा १ वटा र दिमीखोलामा १ वटा कल्र्भट निर्माण गर्नुपर्ने योजना अगाडि सारेको छ । अध्यक्ष लामाले रामेछाप न्युजसँग भने,‘नागरिकहरुलाई सहज रुपमा यातायातको सेवा दिन सडकलाई पहिलो प्राथमिकता राखेर काम गरिरहेका छौ, यस बर्ष खैरेनीघाटको पुल सञ्चालनमा आएपछि धेरै सहज हुनेछ ।’