कांग्रेस नेता चौलागाईको पैसा फिर्ताः सुनापती गाउँपालिकाले नै किन्यो विद्यालय बस

स्नेहा सिलवाल
४ मंसिर, रामेछाप ।
विद्यालयको बसमा नाम राख्नु पर्ने अडान राखेपछि नेपाली कांग्रेस रामेछापका महाधिवेशन प्रतिनिधि भरत चौलागाईको पैसा फिर्ता गरेर गाउँपालिकाले नै विद्यालय बस खरिद गरेको छ । सुनापती गाउँपालिका–१ गुन्सीस्थित शतलिङ्गेश्वर माविको लागि चौलागाईले बस खरिद गर्न दिएको पैसा फिर्ता गरेर गाउँपालिकाले नै बस गरिद गरेको हो । विद्यालयको बसमा चौलागाईले आफ्नो नाम पार्टीको पद लेख्नु पर्ने अडान राख्नुभएको थियो ।
विद्यालयको बसमा व्यक्तिको नाम र पार्टीको पद राख्दा राम्रो सन्देश नजाने भन्दै वडा अध्यक्ष राजु चौलागाई ‘चण्डेश्वर’को पहलमा बस गरिद गर्न चौलागाईले दिएको २१ लाख ७५ हजार ६ सय ५० रुपैयाँ पैसा फिर्ता गराउनुभएको छ । विद्यालय व्यवस्थापन समितिले खरिद गरेको बस विद्यालयमा आइपुगेको छ । विद्यालय व्यवस्थापन समितिका अध्यक्ष समेत रहेका वडा अध्यक्ष चौलागाईले बस खरिदको लागि २६ लाख पचास हजार रुपैयाँ खर्च भएको रामेछाप न्युजलाई बताउनुभयो ।

‘विद्यालयमा बस आइपुगेको छ, अब सञ्चालन गर्ने कार्य अन्तिम चरणमा पुगेको छ ।’ ४ सय ५० जना विद्यार्थी अध्ययनरत विद्यालयमा टाढाबाट आउने विद्यार्थीहरुलाई कठिनाई भएको कारण पहिलो पटक विद्यालय बस गरिद गरेको छ । सुनापती गाउँपालिकाको पाँच वटा वडामा पहिलो पटक विद्यालयले बस खरिद गरेको हो ।

बस सञ्चालन भएसँगै वडाको सिमपानी, धारापानी, बोझिनी, ढोडेनी, गुन्सी किल्केटार, खिम्तीवेसी लगायतका विद्यार्थीहरुलाई सुविधा हुने भएको छ । वडाभरी विद्यार्थी ल्याउनको लागि बस सञ्चालन भएपछि विद्यार्थीको संख्यामा समेत बृद्धि हुने विश्वास वडा अध्यक्ष चौलागाईले गर्नुभएको छ ।

‘विद्यालयलाई नमूना विद्यालयको रुपमा विकास गर्ने कार्यमा जुटेका छौ’, उहाँले रामेछाप न्युजसँग भन्नुभयो,‘एडिबीको सहयोगमा नयाँ भवन निर्माण हुने चरणमा छ, विद्यालयको भौतिक पूर्वाधार निर्माणसँग गुणस्तरीय शिक्षामा जोड दिएका छौं ।’